相信大家都吃过丝瓜，知道“丝瓜”又叫“胜瓜”，但大家又有没有考究过个中原因呢？

经我查证，转载出以下学术性文章，比较长，但挺有趣，希望大家睇晒

佛山话速成班

睇电视电影，通常讲几句乡下话，例如臺山话、潮州话，又或者係佛山话，都可以起到谐趣效果。作为学生，我哋要学好英文；作为广府人，我地当然要识讲广府话,广东话,广州话，作为佛山出世O既人，我都好应该喺度探讨吓佛山话。

由於佛山话又可以细分为老城区话、石湾话、南海话、顺德话等等，每种话都有各自特点，所以喺度主要参考老城区话，从声母、韵母/声调以及习语四方面与广州话嘅分别总结佛山话嘅大致发音特点。

一、声母  t —> h
    佛山话声母嘅最大特点就係冇声母t，广州话以t为声母嘅字，喺佛山话一律以h代替。例如：“天天见面”讲成“牵牵见面”、“通杀”讲成“兇杀”。更有顽固人士，将呢个规律应用到普通话上，因此“普通话”变成“普哄话”，“太阳”变成“害阳”。
    佛山话嘅发音同广州话相比，除咗呢个显著分别，另外重有个别字嘅声母有变化，不过好难总结成规律。例如[佢]keoy5字，佛山话大多将其读成heoy5；[瞓]fan3字读成han3。

二、韵母
 1.i[*衣] —> y[*於]
    而家唔少人为咗开玩笑，都将“咩事”讲成“咩树”，其实呢个读音就係来源於佛山话。喺佛山话里面，韵母i[*衣]通常都读成y[*於]，例如[宝芝林]变成[宝猪林]，[厕所]变成[处所]，[丝]变成[输]，所以佛山人叫“丝瓜”做“胜瓜”，因为“输输”声唔好“轻（听）”。更有甚者将此规律应用到普通话甚至英语上面，我以前个化学“老书”用普通话同我哋讲解“原子”、“分子”嘅时候，就讲成“原组”、“分组”；电脑城个电脑仔更加搞笑，上次帮我部电脑重装系统，话要格式化个“输盘”，其实係话格式化个C盘。

 2.aau[*教] —> el（类似英文tell单词黑体部分发音）
    某一部分字有呢种情况出现，例如[搞]读成gel2，“瞓觉”读成han3 gel3，但係呢个规律唔可以乱用於所有包含aau韵音嘅字上面，因为有好多字係唔允许噉发音嘅。 

三、声调  第四声－>第一声高降调
    佛山话嘅声调规律祇得一个，亦唔会有其他特别情况，所以比较讲起上嚟比较简单。佛山话冇第四声（阳平声），凡係广州话第四声嘅字一律转调为第一声嘅高降调。粤语第一声可以分为高平调同高降调，举个例，“村庄”个[村]读高平调，“思想”个[思]读高降调，关於高降调嘅更详细说明可以参考《当今粤语懒音现象大观》嘅声调部分。
    虽然佛山话声调祇有一个规律，但係声调嘅变化係最难掌握嘅，好多贪过癮想学佛山话嘅人往往就係掌握唔到声调嘅控制，该变调嘅乱变，唔该变调嘅都变埋。

四.石湾话  
    石湾话比老城区话口音更浓，比广州话变化更加大 。例如[眼]讲成en5，[烟]讲成en1，三个代词[我]、[你]、[佢]读成oi5、li5、ky5。为咗加深大家对佛山话嘅印象，下面送首用佛山话（石湾话）唱出嚟嘅歌仔畀大家：
    石湾[wen1]石湾[wen1]好多烟[en1]
    烟[en1]亲我[oi5]隻眼[en5]
    医来[loi1]医去都医唔[m1]返[fen1]
    我[oi5]以后都唔[m1]去石湾[wen1]
    上面首咁抵死嘅歌仔用石湾话唱出嚟，原来係押韵嘅！

五.习惯用语
    此外，佛山话重有一部分习惯用於唔同于正宗广州话，例如：
    嗰—>佬：嗰个—>佬个，嗰便—>佬便，嗰日—>佬日
    喺度—>喺盖：阿哥喺唔喺度呀？—>阿哥喺唔喺盖呀？
    返屋企—>去归：返屋企食饭—>去归食饭
    未—>命：佛山话“未曾”讲得快，就变成[命]音，因此，“食饭未”就变成“食饭命”
    叫—>el：叫你你又唔应—>el你又唔应
    咗—>hel：做咗功课未？做咗。—>做hel功课命？做hel。
    由於本人接触面有限，仅能总结以上几个，希望各位佛山嘅老乡提供更多例子。

PS:现时佛山嘅人讲咩话?

佛山市，不同区不同镇的方言都有不同，甚至有些是明显很大的差异；甚至有些地方，同一个镇都有好几种地方话。

一.禅城区

    1.老城区:佛山话,广州话(老城区原住民较多,他们都是标准的佛山口音;而年轻原住民能讲标准的佛山话与广州话)

    2.除老城区和石湾以外的地区:广州话(这些地方主要是人员构成主要是外来的,特别系年轻人,都可以讲标准广州话，有啲年轻人仲偏向香港口音，但唔排除某些长者有佛山口音）

    3.石湾：石湾话（石湾话根深蒂固，大部分年轻人也带石湾口音）

    4.南庄：南海南庄话

二、南海区：

    1.桂城：带不同口音的南海话，广州话（桂城为南海中心，人员构成复杂）

    2.南海其他地方：西樵话、九江话、沙头话、丹灶话、大沥话、平洲话

三、顺得区：

    顺德话，但各镇又有不同的口音

四、三水区和高明区：
    不详....